Bir çox abituriyent ali təhsilə keçidi asanlaşdırmaq üçün əvvəlcə kollecə daxil olub, daha sonra universitet təhsilinə keçməyi düşünür.
Bəs bu yolun üstünlükləri və çatışmazlıqları nələrdir? Universitetə birbaşa qəbul ilə müqayisədə, hansı hallarda kollecə daxil olmaq və ya birbaşa universitet yolunu seçmək daha məqsədəuyğundur?
Bu barədəRedaktor.az-a açıqlamasında ali təhsil üzrə ekspert Vüsal Kərimli bildirdi ki, dünyanın demək olar ki, heç bir yerində rast gəlinməyən bir təcrübədir, amma ölkəmizdə tətbiq olunan bu model kifayət qədər maraqlıdır.
“Son illərdə kolleclərdə rəhbərliyin yenilənməsi, şəffaflığın artırılması, tələbə biliyinin qiymətləndirilməsində qeyri-qanuni halların aradan qaldırılması artıq kolleclərin məzunlarına olan etibarı və onların aldıqları qiymətlərin etibarlılığını xeyli gücləndirib. Fikrimcə, bu çox yaxşı və müsbət nəticə verən bir təcrübədir. Digər tərəfdən, kollecdə oxuyanların hamısının universitetə daxil olmaq kimi bir məqsədi olmur, hətta bir çoxları buna maraq da göstərmir. Əslində isə mən hesab edirəm ki, kolleci bitirdikdən sonra universitetdə bakalavr təhsilinə davam etmək həm daha məntiqli, həm də daha uğurlu bir strategiyadır. Bu yol, tələbənin gələcək peşə hazırlığı və karyera imkanları baxımından daha sağlam və effektiv addımdır”, – deyə ekspert vurğulayıb.